قصيده رائعه

من طرف broken hearts السبت أغسطس 29, 2009 7:37 am

:: الشاعر كاظم اسماعيل كاطع ::

ماخذ وياي العراق بجنـطه
ما كفت الجنـطه
طالعه منها مناره وعثگ نخلـه
وشعله من عيون نفطه

وراح نوصل… ذاك حد السيطرات
وذيچ ضوايات المحطه
وين اضمها؟
لا هوه اكتاب ويخليه المسافر جوّه أبطـه
الحمد لله.. الدنيا ليل… ونقطة التفتيش سنطه
هاي نقطه ويمها واحد
نقطتين.. تلاثة.. خمسه
ست نقاط ويمها واحد!!
تنحسب مليون نقطـه

وصاح مسؤول النقاط بصوت عالي
هاي ما معقوله جنطـه
بصيحته انزرعت الساحــه
رجال أمن ورجال سلطه
بجرة السَحّاب شافت عينه نجمـه
وطگته ريحة الحنطــه
ما لگه غيرالعلم.. گلي شيـفيدك ؟
گتله غربه.. إحنه غربه
ومن نموت هناك… چا بيش نتغطه؟
أخذ للجنطه تحيه… وگلي توصل بالسلامه
وهاي أول مره أفوت بسيطره…
وما انطي رشوه وتستعد گدامي شرطه